bidasoamedia bidasoamedia

Aitzpea Gonzalezek zilarrezko domina lortu du Espainiakoan

Espainiako bigarren gelditu da Aitzpea Gonzalez Santiagotarrak K.E.ko arraunlaria, 23 urtez azpiko skiff proban. Joan den asteburuan jokatu dute aulki mugikorreko Espainiako Txapelketa, Banyoles-en (Girona).

Tesorierek ordezkatuko du Beltza

Ustekabekoa eduki du Bidasoak, Markel Beltzak ez baitu lehen taldean jarraituko, hurrengo denboraldian. Lan eskaintza bat onartu eta eskubaloi profesionala utziko du. Eragozpena azkar gainditu du kirol zuzendaritzak, hala ere, Zumarragakoak defentsa horian utzi duen zuloa estali baitu. Thomas Tesoriere 29 urteko frantziarrak ordezkatuko du Markel Beltza.

Maila handia eman dute Hondarribiko ontziek, udaren hasieran

Indartsu ekin diote Hondarribiko ontziek udarako arraun denboraldiari. Gizonezkoen ontzi nagusia bigarren izan da Eusko Label Ligako lehen jardunaldian, Bilbon, erlojuaren aurkako lehian. Urdaibaik irabazi du, baina berdeak aurretik ibili dira azken ziabogara arte. Nabarmentzekoa da, dena den, estropadako onenen arteko berdintasuna. Lehen sei sailkatuak bederatzi segundoko tartean sartu baitira helmugan.

Urterik onena borobildu dute BATeko emakumeek

Ohorezko Mailan jarraituko du Super Amara BATeko emakumeen talde nagusiak, hirugarren urtez jarraian. Iaz ez bezala, aurten emakumeek ez dute gehiegi sufritu behar izan, mailari eusteko. Laugarren izan dira jaitsiera ekiditeko lehian, larunbatean Valladoliden. Hamabigarren, guztira, estatuko maila gorenean, lau talde atzean utziaz. Historiako sailkapen onena du, hortaz, BATeko emakumeen talde nagusiak.

Real Union arnasberritzera datoz Ceberio eta Martinez

Azken fitxaketek Real Unioneko lehen taldearen batez besteko adina nabarmen jaitsi dute. Jon Ceberio erdilari donostiarrak 21 urte ditu; Javi Martinez aurrelari iruindarrak 20. Nafarroara begira ari da, hain zuzen ere, Eneko Romo kirol zuzendaria, Peña Sport-en eta Izarran aritu baitira bi jokalariak aurten, hurrenez hurren. Joan den astean kontratua sinatu zuen Yoel Sola ere Izarra taldetik dator.

Lehen lerrorako errefortzua izango da Seri

Rudy Seri frantziarra fitxatu du Bidasoak, datozen bi denboraldietarako. 24 urteko ezker alboko jokalaria da eta Frantziako ligan aritu da azken denboraldietan, lehen eta bigarren mailan, Selestat Alsace taldearekin. Lehenago Troyes taldean ere ibili zen.

Azken probak egin dituzte Hondarribiko ontziek

Denboraldiaurreko azken estropada eduki dute Hondarribia Arraun Elkarteko traineruek larunbatean, Gure Esku Dago banderan, Lekeition. Gizonezkoek ez dute mailarik onena eman, laugarren izan baitira, Zierbenaren, Santurtziren eta Donostiarraren atzetik. Irabazleak baino 25 segundo gehiago behar izan ditu Ama Guadalupekoak.

Europako Txapelketako podiumera igo da Aitor Gorrotxategi

Brontzezko domina jantzi du Aitor Gorrotxategi piraguista irundarrak, Europako Esprint Txapelketan, Belgraden (Serbia). K4 kategoria absolutuan lortu du Santiagotarrak K.E.ko palistak, Javier Hernanz (Asturias), Pelayo Roza (Asturias) eta Ruben Millan (Galizia) taldekideekin, 1.000m-ko distantzian. Domina eskuratzeaz gainera, abuztuaren amaieran Portugalen jokatuko den Munduko Txapelketan parte hartzeko txartela lortu du laukoak.

Real Unionen zelai erdia indartuko du Solak

Yoel Sola (Iruñea, 1992) erdilaria kontratatu du Real Unionek, datozen bi denboraldietarako. Osasunan eta Peña Sport-en ibilia da nafarra, eta azken hiru sasoietan Izarran aritu da. Aurten 32 partida jokatu eta zortzi gol sartu ditu.

Eskualdeko mendate nagusiak igaroko ditu Juanma Garate Martxak

IX.edizioa izango du Juanma Garate Zikloturista Martxak. Egonkortuz doa Irungo Txirrindulari Elkarteak antolatzen duen proba. Bi ibilbide edukiko ditu aurten, 72km-koa laburra eta 122koa, luzea. Ekainaren 17an 8:00etan irtengo dira txirrindulari guztiak San Juan plazatik. Bezperan, Bizikleta Festa egongo da San Juanen bertan, 16:30etatik aurrera. Herri Spinning Maratoia eta haurrentzako gymkana.