bidasoamedia
Eskualdeko hiru sortzaile gazteren lanak ikusi ahal izango dira hurrengo hilabeteetan Irungo Martindozenea gaztelekuan, Gazteartean programaren baitan. Telmo Iridoy hondarribiarraren lanak daude orain, eta Andrea Scargot eta Miriam Loidi artistek jarriko dituzte erakusketak, ondoren.
Dultzainaren doinuak lagundu izan ditu, urtetan, Irungo hainbat ekitaldi eta ospakizun. Bereziki ekainaren 29ko goizarekin lotzen du, jende askok, hirian. Bada, instrumentua Irunen zabaldu izana Agirretxe familiari zor zaio, neurri handi batean. Agirretxetarrak, Gipuzkoako dultzainaren testigantza disko-liburua argitaratu berri du Soinuenea Fundazioak, Irungo Udalaren parte hartzearekin. “Kolaborazio honen bidez, euskal musika tradizionalaren eta dultzainaren balioa azpimarratu nahi ditugu”, adierazi du Juncal Eizagirre Kultura arloko ordezkariak. Gainera, martxoaren 4an, Agirretxetarrak omentzeko emanaldia egin dute San Juan plazan, Meakako Adixkideak dantza taldeak antolatuta.
Presidentea eta zuzendaritzako lan talde berria hautatu berri dituzte Ametsa abesbatza elkarteko bazkideek. Jokin Babaze, 30 urteko irundarra, eta 9 urte zituenetik elkartean aritutakoa izan da lehendakari berri gisa hautatua. Orain arte, Euskal Herriko Abesbatzen Federazioko idazkari nagusia zen, eta lan horretan jarraituko du.
Bertsolaritza ardatz hartuta, Irungo euskal kulturaren erdigune bilakatzen da Kabigorri, hilabete bakoitzeko lehen ostegunean. Formatu txikiko bertso saioak antolatzen ditu bertan Irunabar bertsoaren bilguneak. 2013. urtean ekimena martxan jarri zutenean zalantzak eduki zituztela onartu dute antolatzaileek. Denborak erakutsi du, ordea, ideiarekin asmatu zutela. Bost urte bete dituzte aurten Kabigorriko bertso-gauek.
James Joyce irlandarraren The Dubliners lanaren euskal bertsioa prestatu du Ados Teatroa konpainiak. Igandean Hondarribiko Itsas Etxea auditorioan eskainiko du, 20:00etan. Sarrerak dagoeneko salgai daude Arma Plazan eta Interneten (8 euroan sarrera orokorra, 5 euro 18 urtetik beherakoena).
Bost igandetan ganbera musika kontzertuak emango dituzte Amaia Kultur Zentroan. Irungo Udaleko Kultura arloak eta berriki hiriko Urrezko Domina jaso duen Ricardo Requejok antolatu dute egitaraua.
Ez ohiko irakaslea dute Irungo Mendibil Formazio Zentroko Ile-Apainketa zikloko ikasleek. Hasieran mesfidantzaz hartu zuten, baina gaur egun, mirespenez hitz egiten dute La Basuri buruz. Ezizen horrekin ezaguna da Elena Caballero bizkaitarra (Etxebarri, 1983), rap-aren munduan, eta azken aldian, handik kanpo ere bai. Rap tailerrak ematen ditu, eta urriaz geroztik, Letxunborro hiribideko Mendibilen ari da.
Urriaren 19tik 22ra izango da aurtengo Hendaia Film festibala. Festibalaren irekiera ekitaldia ostegunean19:30ean izango da, Hendaiako Varietes zinemagelan. Bertan emango dituzte jaialdiko filmak.
Bost talde eskaintzen ditu Txingudi Bertso Eskolak. Doakoak dira denak, Bidasoa-Txingudi Mugaz Gaindiko Partzuergoak diruz lagunduak baitira. Helduentzako bat-bateko bertso eskolak hiru taldetan banatu dituzte, parte hartzaileen esperientziaren arabera. Bertsolaritza tailerra ere egongo da, bertsogintza ez ezik (bat-batekoa eta idatzizkoa), bertsolaritzaren eta bertsogintzaren inguruko beste zenbait gai landuko dituena. Aurten, Xanti Zabala “Lexo” (Lezo, 1942-2012) zenaren omenezko kantaldia antolatzea izango da tailerraren ekimen nagusia.
Ezaugarri bereziak eduki ditu Irungo Udalak antolatzen duen Adour-Bidasoa pintura lehiaketaren 26.edizioak. Hiru irabazleak emakumeak izan dira, eta horietako bi, irundarrak, irakasle-ikasleak, gainera. Susana Ferreirak eskuratu du sari nagusia, eta Patricia Taberna ikasleak artista gaztearen saria. Epaimahaiaren sari berezia Ana Salegi donostiarrak irabazi du. Haien lanak Amaia Kultur Zentroan jarri duten erakusketan ikus daitezke, beste 21 lanekin batera, urriaren 15era arte.